忙碌的媽媽



作為一個在職媽媽,睇下我放工之後既活動.....

媽媽放工去接我放學，因為學校六點就關門，

所以媽媽放工要即刻走，佢成日話自己「i believe i can fly」

次次媽媽接我放學，我一去到火車站就會乖乖地瞓覺，

可能係因為媽媽揹住我一路行太舒服喇......

我乖乖瞓一陣落車就會醒，

醒左就可以同媽媽玩，

其實媽媽次次見我瞓左都會望住我，仲會笑.....

有時仲會拖住我手仔喃喃自語,話等我大個女拖住手手去行街...

搭火車地鐵好多人,佢都會保護我........

返到屋企媽媽放我響床仔再瞓多一陣，

佢自己就會去沖涼，跟住就暖奶奶，

再同我沖涼，換衫，再餵我食奶奶.....

今晚我食左好耐，所以媽媽幫我換左個奶咀，我先至食得晒d奶奶咋，

唔該媽咪........

我食飽飽，媽媽幫我掃風，再抱住我等我瞓左，

先至放我落床仔，以免我嘔奶，

佢次次抱住我就會幫我搽咀咀同面仔......

佢話如果唔係會乾燥就會痛痛....

到我瞓到好似豬仔咁佢先安心，

輕手輕腳放我落床仔.......

跟住媽媽仲未忙完.....

佢要泵定奶奶俾我下一餐食........

佢通常一路泵奶奶就一路快快地食佢既晚餐，

慳得一分鐘得一分鐘.....

泵完奶奶，再去洗奶樽烚奶樽，執番好間屋，

有時我返學整污漕左d衫衫褲褲佢要洗左佢，

再幫我睇下手冊同執定明天返學既衫同書包仔.........

終於，佢可以休息喇.......

爬上床既時候已經十點幾.......

十二點佢又要起身幫我換片片同餵我食奶奶，

有時我好眼瞓食得好慢.....佢又要慢慢叫我起身食........

搞下搞下都成兩點先再瞓.....

但係佢五點又要再起身梳洗，

再泵定奶奶俾我做早餐，

佢次次都會好安靜，只係開少少燈，因為佢怕整醒我同爸爸，

泵完奶，佢會去換返工衫，

再輕輕抱我去換衫，餵我食奶奶，

等我食飽飽，俾我瞓響床仔休息一下就抱住我出門口........

帶我返學，

之後又要連忙跑住返工，

好彩媽媽老闆好好人好體諒媽媽，媽媽真係已經跑得好快喇........

媽媽就係日日咁樣過日子，(我偷偷地聽到佢話自己兩星期瘦左6磅).....

不過我未聽過佢叫辛苦，

佢成日話只要見到我健健康康，對住佢笑咪咪，

佢再辛苦都會唔記得........