我的小花場

琴日去完發叔個花場，今日不如就去睇下我屋企d花啦。

近排好多花都開晒，真係好靚，花開富貴。

呢排買左好多，兩個星期買左十盆，難得既係我老公冇投訴....仲幫我買左個花架俾花兒，多謝佢咁愛我。

 

每一盆都好特別架，等我介紹一下

Pixie Run Around 係超迷你版，果日去發場問過發叔，發叔話生長勁慢一年才可以開花。

Pacific Pearl 係白底紫邊的小花

Irish Flist係今年情人節，我大小情人送俾我架，呢棵係我想左好耐好耐既一棵，因為佢好特別係綠色花架，發叔話好難種。

 

Lemon Drop 係白黃色花架，我覺得佢d 先毛好得意，同平日見既不同，好似起雞皮咁......囡囡叫佢做檸檬。

Ness Satin Rose 粉色加深粉色邊好高貴，囡囡叫佢Rose。

Rob's Smarty Pants 白底加少少粉紅少少黃色花，第一次種Rob's 系統。

 

Lil Bit O' Irish 係粉白花，呢棵係斑葉，近排我愛賞花又賞葉，囡囡叫佢大斑葉，因為有一棵小苗叫小斑葉。

A224.......呢棵係老公揀的，係紫白綠邊，條邊會變色，冬天係白邊，夏天係綠色，真係好特別。



 

 

 



 

發叔花場朝聖

天下了一星期，幸好星期六終於見到太陽伯伯出來了，一家三口一到假日總會駕住我們的小車周圍去，放一放一星期的悶氣，出外放放電。

今個星期由我發板，一於去朝聖，種開AV(Afrian Violet)的一定都認識發叔，但聽就聽得多，一直未去過佢個花場，一於去逛逛。

發叔花場位於粉嶺東閣圍村去探發叔之前記住打個電話(TEL: 90753617)俾佢先呀，因為我地第一次去發叔好好人出村口接我地。

去到個個溫室，真係好大好多靚花

 

由於多日花友不多，囡囡都可以自己周圍行，周圍睇

 

 

而我就可以安心慢慢揀花睇花，一開始花多眼亂，真係不知從何入手!!!!!

我一直喜愛迷你種，發叔指點我哪些是迷你種，所以我開始在迷你欄睇，不知不覺行左兩個半小時，我揀左四盆小花，老公都揀左一盆(老公原本不是一個花迷，今天只是投我所好陪我去，估唔到連佢都睇中左花，主動叫我帶回家，仲一齊揀一盆肥肥白白的回家。)

其實，一家人要互相投入大家既生活，互相欣賞，感情才會長久。

 

行左兩個半鐘，囡囡都好乖，只係行到腳仔攰!!!

(原本以為呢d花場一定好多蚊，果日去到真係好開心，一隻蚊都冇，唔洗擔心蚊咬，可以放心行。)

最後送上幾張相片同大家分享一下。

 

 

 

 

廸士尼換季@Uniqlo

原來今年係廸士尼90週年，唔怪得之咁多個品牌都不約而同地推出廸士尼既東西啦，夏天不知不覺已經黎喇，係時候買d夏天衫喇。

行下街睇下，都係覺得Uniqlo既比較合心，質地好，剪裁靚，價錢亦合理。

初初只係諗住買俾囡囡，點知最後買左3件俾自己，3件俾囡囡。

 

依家同大家分享一下收獲先

 

第一件，係灰色底襯黑色米奇($79)，女孩子不一定要粉紅色，有時轉一轉走型格路線都很吸引，其實呢款有白底藍米奇，可惜只得80碼....，囡囡著100碼，呢件係Baby款，所以肩膀有扣，方便穿著，好細心呀。

 

第二件，係Rilakkuma Tee ($79)，之前知道最細110碼而止步(因為囡囡依家91cm)，後來攞上手睇原來110都唔係好大件，所以買左件俾囡囡，打算今年長少少可以當身衫，出年就會FIT晒。

 

第三四件，係行過見到kids款，米白底藍色小米奇間條($59)，清清地好靚，仲要咁平，吸引吸引，最細100碼，再睇原來最大150碼，心郁郁，但係生女之前都著唔落童裝，但係都係好靚喎，膽粗粗去fit一fit，居然我著，開心死我喇！開心到fitting都要影相.....開心到癲左.......

 

 

最讚係佢係米白色，而且質地好好，仲要唔透(唔洗打底)，即買，買一件俾囡買一件俾自己........去廸士尼可以著親子裝。

 

第五六件，Uniqlo真係好，你鐘意乜顏色都可以搵到，搵呀搵，搵到我鐘意的海藍色，只係睇個色已經好清新，好夏天，個print仲要係高貴既Marie,而價錢只係$99,質地好好，海藍色可以就咁著不用打底(所以買左M碼)

 

而白色比較透，我要打底，所以買左L碼。